புன்னைமரம் : அறிவியலாளர் பார்வைக்கு

 விளையாடு ஆயமொடு வெண் மணல் அழுத்தி

 மறந்தனம் துறந்த காழ் முளை அகைய

 நெய் பெய் தீம் பால் பெய்து இனிது வளர்ப்ப

 நும்மினும் சிறந்தது நுவ்வை ஆகும் என்று

 அன்னை கூறினள் புன்னையது நலனே

 அம்ம நாணுதும் நும்மொடு நகையே

 விருந்தின் பாணர் விளர் இசை கடுப்ப

 வலம்புரி வான் கோடு நரலும் இலங்கு நீர்த்

பகலில் தலைவன் தலைவியைக் காணும் ஆவலில் அவள் வீட்டின் அருகே உள்ள புன்னை மர நிழலில் வந்து காத்திருந்தான். தோழியோ அவன் இதுவரை காதலித்தது போதும் தலைவியை விரைவில் திருமணம் செய்து கொள்ளத் தூண்டவேண்டும் என எண்ணினாள் அதனால் தலைவனிடம் தோழி கூறுவாள்........

நீயோ தலைவியைச் சந்தித்து மகிழ்வதற்காக இங்கு வந்திருக்கிறாய். ஆனால் தலைவியோ இவ்விடத்தில் உன்னுடன் மகிழ்ந்து உறவாட விரும்பவில்லை. ஏனென்றால்....

யாரவது தம் தங்கையின் முன் காதலித்து மகிழ்வார்களா?
ஆம்... நீ நிற்கும் இந்த புன்னை மரம் எங்களுக்குத் தங்கை உறவாகும். அதனால் நீ வேறு மர நிழல் உண்டா என்று பார் என்கிறாள்....

இப்பாடல் வழி சங்க காலத்தில் மரங்களையும் உறவாக, உயிராக மதித்தமை
பழந்தமிழர் இயற்கையோடு கலந்து வாழ்ந்தமை, இயற்கையை தமது உறவாகக்  கருதியமை  ஆகியன இதனால் வெளிப்படையாக நாம் அறியமுடிகிறது .சங்க இலக்கியங்களில் பரவலாக இந்த மரம் பற்றிய குறிப்புக்களை நாம் காண முடியும் . இரண்டாயிரம் ஆண்டுகளாக தமிழ் வரலாற்றில் இடம் பெற்ற புன்னை மரத்தின் நிலை என்ன ?பொதுத்துறை நிறுவனங்கள் உருவாக்கிய வாழ்க்கை ஒரு வரலாறை மக்களிடமிருந்து எவ்வாறு அகற்றியுள்ளது ?

நான் சிறுவனாக இருந்தபோது நான் வாழ்ந்த குமரி மாவட்டம் முழுவதும் பரவலாக புன்னை மரத்தைக் காண முடிந்தது புன்னை எண்ணை பரவலாக மக்களுடன் புழங்கியது ; இது மக்களால் விளக்கெண்ணெய் என்று  அழைக்கவும் பட்டது . காரணம் மின்சாரம் இல்லாத அக்காலத்தில் விளக்கு    எரிப்பதற்கு மக்களுக்கு மிகவும் உதவியாக இருந்த எண்ணை இந்த புன்னை எண்ணையாகும். .

மட்டுமல்ல கோவில் விழாக்களில் வெளிச்சம் ஏற்படுத்த அக் காலத்தில் பயன்படுத்தப்பட்ட தீவட்டியில்வைத்து எரிக்கப் படும்கிளியை இவ் எண்ணெயில் நன்கு ஊறவைத்துப் பின்னர் தீவட்டியில் பொருத்துவர் .பின்னர் அது எரியும்போது இதே விளக்கு எண்ணையை அதன்மீது ஊற்றுவார். நெடுநேரம் எரியும் ;  வெளிச்சம் தரும்.விளக்கெண்ணெய் பயன்படுத்துவதால்தான் தீவட்டி நெடுநேரம் எரிகிறது என்பர் மக்கள் . நம் முன்னோர் புன்னை எண்ணையில் இருக்கும் எரிபொருள் குறித்து அறிந்து இருந்ததனால்தான் இவ் எண்ணையை விளக்கு எரிக்கப் பயன்படுத்தியிருக்கின்றனர்  .

தற்போது, நான் பிறந்து வளர்ந்த குமரி மாவட்டத்தில் புன்னைமரம் முற்றிலும் அழிந்துவிட்டது . குமரி மாவடத்தில் காவு கோயில்களில் மட்டும்தான் புன்னைமரம் வாழ்கிறது . நெய்தல் நில மரமாக தமிழ் மக்களோடு வாழ்ந்த புன்னைமரம் பாண்டிச்சேரியில் பிராஞ்ச் குடியிருப்புப் பகுதியில் அழகுக்காக வளர்க்கப் படுவதை நான் பார்த்து மகிழ்ந்தேன்  .தற்போது புன்னை மரத்தின் நிலை என்ன ?அதன் புன்னை எண்ணையை நாம் தற்போது பயன்படுத்தமுடியுமா?அறிவியலாளர்கள் இதற்குப் பதில்சொல்ல வேண்டும் . அரசாங்கம் புன்னைஎண்ணெய் சார்ந்த ஆராய்ச்சிக்குக்  களன் அமைத்துத் தரவேண்டும் . ஆனால், எந்தவித அரசு மற்றும் அறிவியல் அறிஞர் உதவியும் இல்லாமல் ஒரு விவசாயி டீசலுக்கு மாற்றாக புன்னைஎண்ணெயை   பயன்படுதிவருகிறார் . உலகம் இதை மறைக்க வேண்டுமா? மறுக்க வேண்டுமா? ஆராயவேண்டுமா ?புன்னைமரத்தை பாதுகாக்க வேண்டுமா ?அணைத்து கேள்விகளு கும் மக்கள் பதில்சொல்லட்டும் ;காலம் முடிவுசெய்யட்டும்.

நாகப்பட்டணம் விவசாயி பற்றிய செய்தி உங்களுக்காக

அறிவிக்கப்படாத மின் வெட்டு.. தலை விரித்தாடும் டீசல் தட்டுப்பாடு, என்று கடந்த சில மாதங்களாக தமிழகமே திண்டாட்டத்தில் இருக்கிறது.பம்ப்செட்டை நம்பியிருக்கும் பயிர்கள் எல்லாம் தாகத்தில் தவிக்கின்றன. ‘இதே நிலை நீடித்தால் விவசாயத்துக்கு எதிர்காலமே இல்லை’ என்றபடி விவசாயிகள் பலரும் தலையில் கை வைத்து உட்கார்ந்திருக்கிறார்கள்.
ஆனால், நாகப்பட்டினம் மாவட்டம், கண்டியன்காடு கிராமத்தைச் சேர்ந்த தீவர விவசாயி ராஜசேகரோ.. மின்சாரத்தையும், டீசலையும் நம்பாமல், “புன்னை, கைவிடாது என்னை… !” என்று தெம்பாகச் சொன்னபடி, தன் தோட்டத்துக்கு தேவைப்பட்ட போதெல்லாம் தண்ணீர் பாய்ச்சிக் கொண்டிருக்கிறார்.. புண்ணை எண்ணெய் புண்ணியத்துல !

ஆம்.. பம்ப்செட் மோட்டாருக்காக முழுக்க முழுக்க இவர் பயன்படுத்துவது புன்னை எண்ணெயைத்தான் !இதைப் பற்றிக் கேள்விப்பட்டதுமே.. “என்னது புன்னை எண்ணெயில்.. பம்ப்செட் ஓடுதா..?” என்று உற்சாகத் துள்ளல் போட்டபடி கண்டியன் காடு சென்றடைந்தோம்.

குளிர்ந்தக் காற்றையும், பரந்த நிழலையும் வாரி வழங்கியபடி தோட்டத்தில் நின்றிருக்கும் புன்னை மரங்கள்.. பூமாரி தூவிக்கொண்டிருந்த வேளையில் உள்ளே நுழைந்தோம்.

சடசடவென புன்னைக்கு ‘வாழ்த்துமாரி’ பொழிய ஆரம்பித்தார் ராஜசேகர்

 “டீசல் மோட்டார் பம்ப்செட்டுகளில், டீசலுக்குப் பதிலாக புன்னை எண்ணெயைப் பயன்படுத்தினால் பல மடங்கு செலவு குறையும். கூடுதல் இணைப்பாக சுற்றுச்சூழலும் பாதுகாக்கப்படும் இந்த மரத்தை, இயற்கை நமக்குத் தந்த வரம்ன்னு தான் சொல்லணும். இதுக்கு இலையுதிர் காலம்ன்னு ஒண்ணு கிடையாது. வருஷம் முழுக்க நிழல் கொடுக்கும். மழ வரப்போகுதுன்னா, ஒரு வாரத்துக்கு முன்னாடியே நமக்குச் சொல்லிடும். அதாவது, மரத்துல பூ பூத்துக் குலுங்கினா, கண்டிப்பா மறுவாரம் மழை பெய்யும். புயல் அடிச்சாக்கூட சாயாம நிக்கக்கூடிய மரம். இது கடற்கரையோர பூமி, சுனாமி வந்தப்பக்கூட இந்த மரங்களுக்கு ஒண்ணும் ஆகலனா பார்த்துக்கோங்க.. இந்த அளவுக்கு வலுவான மரம். இதுக்கு எத்தனை வருஷம் ஆயுள்ன்னு தெரியல. 0,70 வருஷத்துக்கும் மேல் வயசுள்ள மரங்கள் கூட விதைகளைக் கொட்டுது என்ற புன்னையை வாழ்த்தித் தள்ளியவர்.

“செடியை நட்ட 5ம் வருஷமே காயாகி, பழம் கிடைக்கும். புன்னை மரம் இருந்தாலே வெளவால் நிறைய இருக்கும். அதுங்க பழத்தைத் தின்னுட்டு, கொட்டையைக் கீழே போட்டுடும். அதனால பழத்தைக் காய வைக்க வேண்டிய அவசியம் இல்ல. தானா கீழே விழுற பழத்தை ஆறு நாளைக்கு வெயில்ல காய வெச்சா.. கொட்டையை உடைச்சி எடுக்கலாம்.

கொட்டைக்குள்ள இருக்கற பருப்புதான் முக்கியம். அதைத் தனியா எடுத்து, வெயில்ல 10 நாள் காய வைக்கணும். காய்ஞ்ச பருப்பை, செக்குல கொடுத்து ஆட்டினா, 70 சதவிகிதம் முதல் 75 சதவிகிதம் வரை  எண்ணெய் கிடைக்கும்.

அதாவது, ஒரு கிலோ பருப்புக்கு 700 முதல் 750 மில்லி எண்ணெய் கிடைக்கும். இதுவே மெஷின்ல ஆட்டினா 80 சதவிகிதம் அதாவது ஒரு கிலோ பருப்புக்கு 800 மில்லி எண்ணெய் கிடைக்கும்.
கரும்புகை போகுது.. கமழும்  புகை வருது !
5 ஹெச்.பி டீசல் மோட்டார் வெறும் 600 மில்லி புன்னை எண்ணெய்தான் ஊத்துறேன். வேற ஆயில் எதையும் கலக்கறதில்லை. இந்த 600 மில்லி ஊத்தறதுக்கே ஒரு மணி நேரம் ஓடுது. இதுவே டீசலா இருந்தா, ஒரு மணி நேரம் ஓடறதுக்கு 900 மிலி தேவைப்படும்.
ஒரு லிட்டர்  டீசலோட விலை 35 ரூபாய் ஆனா, ஒரு லிட்டர் புன்னை எண்ணெய் தயாரிக்க கிட்டத்தட்ட 10 ரூபாய் தான் செலவாகுது.

மழை இல்லாத காலத்துல தான் மோட்டார் தேவை. அப்படிப் பார்த்தா வருஷத்துக்கு 5 மாசத்துக்குத் தான் மோட்டார் ஓடணும். அதுக்கு 75 லிட்டர் எண்ணெய் தேவைப்படும் இதைத் தயாரிக்கறதுக்கு 800 ரூபாய் தான் செலவு. இதே அளவு டீசலுக்கு.. 2,666 ரூபாய் செலவாகும் என்று கணக்கு வழக்கோடு சொன்ன ராஜசேகர், தன் தோட்டத்தில் இருக்கும் டீசல் மோட்டாரில் புன்னை எண்ணெயை ஊற்றி இயக்கியும் காட்டினார்.

டீசல் மோட்டாரைப் போல குபுகுபுவென கரும்புகை கண்களை சூழவில்லை. வாடையும் மூக்கைத் தூக்கிக்கொண்டு ஓட வைக்கவில்லை. குறைவான புகையே வெளிப்பட்டதோடு, கோயில்களில் கமழ்வதைப் போன்ற சுகந்த வாடையும் வீசியது.
“புன்னை எண்ணெய்ல நிறைய மருத்துவ குணமிருக்கு. அதனால தான் முன்னயெல்லாம் கோயில்ல விளக்கேத்தறதுக்கு இதைப் பயன்படுத்தினாங்க. இந்தப் புகையில நீங்க நின்னாலும் ஒண்ணும் செய்யாது. ஆனா, டீசல் புகைன்னா, கண் எரிச்சல் ஏற்படும். அந்தப் புகையால பயிரும் மாசுபடும். ஆனா, எல்லாவிதத்துலயும் தொல்லை இல்லாதது புன்னை எண்ணெய்தான் ” என்று அதற்கு விளக்கமும் கொடுத்தார் ராஜசேகர்.

புன்னை எண்ணெய் பயன்படுத்துவதால் இன்ஜின் துருபிடிப்பதில்லை. இன்ஜின் இயங்கும் சத்தமும் குறைவாகத் தான் கேட்கிறது. மூன்று ஆண்டுகளாக இந்த எண்ணெயைத்தான் பயன்படுத்துகிறார் ராஜசேகர். இதுவரை இன்ஜினில் எந்தப் பிரச்சனையும் வராமல் மோட்டார் நல்லபடியாகவே ஓடிக்கொண்டிருக்கிறது.
இதைப்பற்றி பேசும்போது, “ டீசல் பயன்படுத்தினப்ப.. ஒரு நிமிஷத்துக்கு 750 லிட்டர் தண்ணியை மோட்டார் கொட்டும். புன்னையைப் பயன்படுத்தினாலும் அதே அளவு தண்ணிக் கொட்டுது. 10 ஹெச்.பி ஜெனரேட்டர், 20ஹெச்.பி ஜெனரேட்டர் இதுல கூட புன்னை எண்ணெயை ஊத்திப் பயன்படுத்திப் பார்த்தேன். நல்லாவே ஓடுச்சி.. எந்தப் பிரச்சனையும் இல்லை.

புன்னை வளர்ப்பு !

• எல்லா வகையான மண்ணிலும் புன்னை நன்றாக வளரும். குறிப்பாகக் கடலோரங்களிலும் ஆற்றோரங்களிலும் சிறப்பாக வளரும். உப்புத் தண்ணீர் பூச்சி நோய் கரையான் என எதையும் சமாளிக்கும் வல்லமை இதற்கு உண்டு.
• நிழலும் லேசான வெயிலும் கலந்த இடத்தில் ஒரு பாலித்தீன் பேப்பரைப் போட்டு அதில் மணலைப் பரப்பவேண்டும்.
• அதன் மீது விதைகளைப் (முழுக் கொட்டைகளாகப் பயன்படுத்தவேண்டும்) பரப்பி அவை மூடுமளவுக்கு மணல் போடவேண்டும்.
• ஒரு நாள் விட்டு ஒரு நாள் தண்ணீர் விடவேண்டும்.
• ஒரு மாதத்தில் செடிகள் முளைத்துவிடும்.
• பிறகு பாலித்தீன் பாக்கெட்டுகளில் மண் மணல் தொழுவுரம் அல்லது மண்புழு உரம் போட்டு ஒரு பாக்கெட்டுக்கு ஒரு செடி வீதம் ஊன்றி தினமும் ஒரு வேளை தண்ணீர் ஊற்றவேண்டும்.
• இதை நிழலில் வைத்துதான் பராமரிக்க வேண்டும். மூன்றாவது மாதம் நடவுக்குக் கன்று தயாராகிவிடும்.
• அரை அடி சுற்றளவு அதே அளவு ஆழம் கொண்ட குழிகளைத் தோண்டி ஈரப்பதம் ஏற்படுமளவு தண்ணீர் தெளித்து அதில் தொழுவுரம் போட்டுச் செடியை நடவேண்டும்.
• ஒரு ஏக்கருக்கு 20 அடி இடைவெளிக்  கொடுத்து நடவு செய்வதன் மூலமாக 75 மரம் வரைக்கும் வளர்க்கலாம்.
• இரண்டு மாதம் வரை ஒரு நாள் விட்டு ஒரு நாள் தண்ணீர் ஊற்றவேண்டும். அதன் பிறகு பெரிதாக எந்தப் பராமரிப்பும் இல்லை.
• ஐந்தாம் ஆண்டில் பத்து அடி உயரத்துக்கு மரம் வளர்ந்திருக்கும். இந்தப் பருவத்தில் காய்ப்பு ஆரம்பிக்கும்.
• பொதுவாக ஒரு மரத்தில் ஒரு ஆண்டுக்கு இரண்டு அல்லது மூன்று தடவை புன்னை மகசூல் கொடுக்கும்.
• ஐந்தாம் ஆண்டு முதல் ஒரு மரத்திலிருந்து ஓர் ஆண்டுக்கு 4 கிலோ முதல் 20 கிலோ வரையிலான பருப்பு கிடைக்கும். 1
• 10 வருடங்களுக்குப் பிறகு 10 கிலோ முதல் 60 கிலோ.. 20 வருடங்களுக்கு பிறகு 50 கிலோ முதல் 150 கிலோ என்று உயர்ந்து கொண்டே போய் 25 வருடங்களுக்குப் பிறகு காய்ப்பின் எண்ணிக்கை கிடுகிடுவென அதிகரிக்கும். 150 கிலோ முதல் 300 கிலோ வரை பருப்பு கிடைக்கும்.அதிகபட்சமாக 500 கிலோ கிடைத்தாலும்  ஆச்சர்யப்படுவதற்கு இல்லை.
  ஒரு மரத்துக்கே இந்தளவு மகசூல் என்றால் ஒரு விவசாயி 10 புன்னை மரங்கள் வைத்திருந்தால் அவரின் தேவை பூர்த்தியாவதோடு மீதியை விற்பனை செய்வதன் மூலமாக லாபமும் பார்க்கலாம்.
• இதற்காக மிகவும் கஷ்டப்படத் தேவையில்லை. குறைந்த நீரில் சிறப்பாக வளரக்கூடிய புன்னை வறட்சியையும் தாங்கி வளரும்.
• பயோடீசலுக்கான மற்றப் பயிர்களைக் காட்டிலும் எளிதாக வளரக்கூடியது.. வளர்க்கக்கூடியது.

சாகுபடி பாடத்தை முடித்து நிறைவாகப் பேசிய ராஜசேகர், “முன்னயெல்லாம் தமிழ் நாட்டோட கடலோரத்துலயும் ஆத்தோரத்துலயும் நிறைய கிராமங்கள்ல புன்னை மரம் செழிப்பா வளர்ந்து நின்னதுங்க. இப்ப அதெல்லாம் மாயமாயிடுச்சி. அதோடப் பயன்பாடு தெரியாம, வெட்டி அழிச்சிட்டாங்க. இனிமேலயாவது  இதுல அரசாங்கம் கவனம் செலுத்தி, புன்னை மர வளர்ப்புல ஈடுபட்டா.. எதிர்க்கால எண்ணெய்த் தேவையை சமாளிக்கலாம். சுற்றுச்சூழலைக் கெடுக்காம..” என்று முத்தாய்ப்பாகச் சொன்னார்.

உரமாகும்பிண்ணாக்கு
ஒரு கிலோ பருப்பை அரைப்பதன் மூலம் 300 கிராம் வரை பிண்ணாக்கு கிடைக்கும். இது வயலுக்கு நலல உரமாகப் பயன்படும்.

ஒரு லிட்டர் புன்னை எண்ணெயைத் தயாரிக்க 10 ரூபாய் தான் செலவு. நம் மோட்டார் தேவைக்குப் போக மீதியை லிட்டர் 42 ரூபாய்க்கு விற்கலாம்.  கோயில்களுக்காக இதை வாங்கிக் கொள்வார்கள்.
ஒரு கிலோ புன்னைப் பருப்பு 20 ரூபாய்க்கு விலைப் போகும். இதைச் சோப்பு தயாரிக்கப்பயன்படுத்துகிறார்கள். இதை வாங்கிச் செல்வதற்காக சோப்புக் கம்பெனி பிரதிநிதிகளும் இருக்கிறார்கள்.

கண்டியன்காடு கிராமத்தில் உட்கார்ந்து கொண்டு, பன்னை எண்ணெயை இந்த அளவுக்கு அலசி ஆராய்ந்திருக்கும் ராஜசேகர், வெறும் விவசாயி மட்டுமல்ல.. டிப்ளமோ இன் மெக்கானிக்கல் இன்ஜினியரிங், டிப்ளமோ இன் ஏரோநாட்டிக் இன்ஜினியரிங் ஆகிய படிப்புகளை முடித்துவிட்டு, இந்திய விமானப் படையில் 15 ஆண்டுகள் பணியாற்றியவர் என்பது குறிப்பிடத்தக்கது. டெல்லி, கொல்கத்தா, சண்டிகார், ஆதம்பூர், பெங்களூரு உள்ளிட்ட பல இடங்களில் இருக்கும் இந்திய விமானப்படையின் தொழில்நுட்பம் சார்ந்த துறைகளில் பணியாற்றி இருக்கிறார். இதன் மூலட் ஏவுகணைத் தயாரிப்பு உள்ளிட்ட பல்வேறு அனுபவங்களைப் பெற்றிருக்கும் ராஜசேகர். “ நிச்சயமா புன்னை எண்ணெய் மூலமா எரிபொருள் தேவையைப் பூர்த்தி செய்யமுடியும். இது நூத்துக்கு நூறு பலன் கொடுக்கும்கிறதுல எந்தச் சந்தேகமும் தேவையில்ல…” என்று அடித்துச் சொல்கிறார்.

புன்னையின் தாவரவியல் பெயர் “கேலோபில்லம் இனோபில்லம் (Calophyllum inophyllum). தமிழ் இலக்கியங்களில் புன்னையின் பெருமை வெகுவாகப் பேசப்படுகிறது. கடலும் கடல் சார்ந்த பகுதிகளான நெய்தல்  நிலத்தின் அடையாளமாகவே, புன்னை மரங்கள் திகழ்ந்திருக்கின்றன. கோயில்களில் புன்னை இலையில் தான் முன்பு பிரசாதம் வழங்கப்பட்டது.  மருத்துவ குணங்கள் இருப்பதால் புன்னை மரத்தடியில் நின்றாலே நோய்கள் தீரும் என்ற நம்பிக்கை இன்றளவும் நிலவுகிறது.

தேனீக்கள் மற்றும் பறவைகளின் புகலிடமாகத் திகழ்கிறது புன்னை. இம்மரத்தின் பூக்களைத் தேடி அதிக தேனீக்கள் வரும். இது தோட்டத்தில் அயல்மகரந்தச் சேர்க்கை சிறப்பாக நடைபெற பெரிதும் உதவியாக இருக்கும். வெளவால்கள் அதிகமாக வருவதால், அவற்றின் எச்சம் உரமாகப் பயன்படும். புன்னை இலைகளை ஆடு, மாடு சாப்பிடாது என்பதுகுறிப்பிடத்தக்கது.

புன்னை  ராஜசேகர் அலைபேசி  எண்: 09751002370

நன்றி : பசுமை தமிழகம் , தமிழ் விக்கிப்பீடியா , http://www.tamilauthors.com